आगामी फागुन २१ गते हुने प्रतिनिधिसभा सदस्य निर्वाचन २०८२ का लागि आवश्यक समानुपातिक तर्फको मतपत्र छपाइ कार्य सम्पन्न भएको जनक शिक्षा सामग्री केन्द्र प्रालिले जनाएको छ।
निर्वाचन आयोगले १ करोड ८९ लाखभन्दा बढी मतदाताका लागि कुल ४ करोड ११ लाख मतपत्र छपाइको जिम्मेवारी जनकलाई दिएको थियो, जसमध्ये समानुपातिक तर्फका २ करोड ८ लाख मतपत्र पूर्ण रूपमा छपाइ भइसकेको छ।
जनकका प्रबन्ध निर्देशक यदुनाथ पौडेलका अनुसार माघ २८ गतेदेखि दुर्गम क्षेत्रलाई प्राथमिकतामा राखी हेलिकप्टर र सवारीसाधनमार्फत मतपत्र ढुवानी गरिनेछ। प्रत्यक्षतर्फका २ करोड ३ लाख मतपत्रमध्ये १ करोड २५ लाख छपाइ सम्पन्न भइसकेको र बाँकी एक साताभित्र पूरा गर्ने तयारी रहेको जनकले जनाएको छ। मतपत्र छपाइ तथा ढुवानी कार्य नेपाली सेनाको सुरक्षा घेरामा संवेदनशील रूपमा भइरहेको छ।
मतपत्र छपाइबाट जनकले करिब २४ करोड रुपैयाँ बराबरको कारोबार गर्ने जनाएको छ। साथै जनकले विद्यालय तहका पाठ्यपुस्तक, विभिन्न आयोगका प्रश्नपत्र तथा नेपाल टेलिकमका रिचार्ज कार्ड छपाइ कार्य पनि समानान्तर रूपमा गरिरहेको जनाएको छ।
समाचार 